Il-platt ta’ ħajti

Tikka wara tikka, imtela bil-ħmieġ.

Xtaqt infarfru u nġibu kif kien.

Imma ma ridnix.

Ried jibqa’ mġiddem u jgħożż it-trab.

Stħajtu u ħbejtu, biex ma jilmħuhx.

Bla ebda kas - ma kkoppax maħmuġ.

Issa rrid nidra.

Hekk kuntent joqgħod, x’niswa jien?

La jislem ir-riefnu u jtajjar dal-frak

Mill-ġdid u għal dejjem jintmesaħ il-platt.

Tinbidel surietu.

U fih nilmaħ xbiheti li qatt ma rajt.

Kif? Biex?

Il-qalb swiedet u  ħmaret ir-ruħ.

Ħfief il-laħam u l-għadam tqal.

In-nifs kesaħ u l-pompa fgat.

L-għajn intilfet u l-ħarsa żżellġet.

Kif?

Biex?

Ir-riħa ta’ demm li issa sar griż,

imliet kull m’hawn.

Għajtet iċ-ċawla tidwi fil-bogħod,

qorbot u ħasdet il-moħħ.

Wara dan, fommok jiċċaqlaq...

... joħroġ is-skiet.

Avventura?

Idha ponn kiesħa f’idu.

Rasha mkebba m’għonqu.

Moħħha mkexkex ma’ nifsu sħun.

Mexjin.

Daħkana.

Ħarsithom titwaħħad

meta d-dlam jirrenja.

Fil-bogħod hemm xemgħa

li dalwaqt tintefa’.

Lil Wildi

Kont nitgħaxxaq narak tikber,

iddaħħakni b’xi praspura. 

Iżda qatt ma kont ħerqan wisq 

ħalli tfittex timmatura.

Għamilt ħilti u anki iktar,

ħa ma ntemmx il-wegħda m’ommok. 

Għajnejk kbar, ħodor ileqqu.

Kienet tiswa d-daħka f’fommok! 

Ġiet ix-xitwa u l-ajru kesaħ.

Ħassejt riefnu u kollox skura. 

Il-ħolm tar u sfixxa f’daqqa.

Ħajti ġiet – karikatura.